Parlamentera Diyarbekirê ya serbixwe Leyla Zanayê îro li Parlamentoya Tirkiyeyê di preskonferansekê de behsa hevdîtina xwe û serokwezîrê Tirkiyeyê Recep Tayyip Erdogan kir û got wê ji Erdogan re behsa mizakereyeka berdewam, perwerdeya bi zimanê kurdî û hebsa malê ji bo rêberê PKK-ê Abdullah Ocalan kir.

Ji bo çareserkirina doza kurdan Leyla Zanayê got wê ji Erdogan re behsa mafên kolektîv yên kurdan wekî ”gelekî” kir û got hêdî dema gotinê derbas bûye û divêt di pratîkê de gavên cidî û semîmî bên avêtin û got:

— Avêtina wan gavan jî bi beşdarkirina hemî aliyan di prosesê de û pêkanîna atmosfereka aştiyê ya berdewam mimkin e.

Leyla Zanayê got ew Tirkiyeya ko di dema xwe de kariye cezayê îdamê rake dikare hebsa malê jî ji bo rêberê PKK-ê Abdullah Ocalan qebûl bike û got divêt ”prosesa Osloyê” ya hevdîtinên di nêvbera MIT-ê û PKK-ê de cardî destpê bike.

Di heqê perwerdeya zimanê zikmakî de jî Leyla Zanayê got:

— Min got li dinyayê ti gel zimanê xwe yê zikmakî bi dana pereyan fêr nabe û min israr li ser mafê perwerdeya zimanê zikmakî kir.

Di heqê îhtimala ko PKK sîlehan dane de jî Leyla Zanayê got:

— Birînên me vekirî ne û xwîn jê têt, lewra daxwazên ko ne realîst bin dê neyên qebûl kirin. Daxaza [dewletê] ko dibêje ”sîlehan danin û operasyon dê rawestin” ne daxwazeka realîst e. Min nemaze behsa vê yekê kir.

Leyla Zanayê got ji dewletan re ne kêmasî ye ko daxwaza lêborînê ji hemwelatiyên xwe bike û got divêt Tirkiye ji bo qetliama Robozkê daxwaza lêborînê ji kesûkarên kuştiyan bike.

Leyla Zanayê got serokwezîr Erdogan bi bêhfirehî guhdariya wê kir û gotinên Erdogan yên di civîna herduyan û piştî civînê de jî nîşan didin ko ew semîmî ye û dixwaze bi diyalogê pirsê çareser bike. (nefel)